朝霧草、斑葉金錢薄荷、黃金萬年草，幾個月冇嚟，朋友Horace的office又多咗好多小生命。「要唔要吖？」Horace問，「知你嚟，諗住畀啲你。」我哋好似玩梗交換禮物，因為我拎咗屋企嘅柚子薄荷同越南芫荽嚟。都係朋友畀的，睇住佢地由奀之之嘅枝梗種到茂盛到癲咗咁，好神奇。我不斷修剪，分盆，不斷同佢地搵好人家開枝散葉，最後可能搞到個個Friend嘅盆栽都有來歷。最初係我枕住搵Horace收留我啲植物囝囡，後來輪到佢不斷送我。其實喺辦公室擺小盆栽冇咩出奇，只係Horace同盆栽嘅關係多咗啲起承轉合，仲幫到佢，好值得同大家分享。
* * * * * * * * *
三年前我拎咗盆吊蘭、到手香同一包蕃茄種子去Horace度，佢一時伊哦盆栽濕立立怕影響辦公室嘅結構，一時驚惹來蚊螆，話座向唔夠太陽，又話冇時間打理。我大力宣傳吊蘭可以淨化空氣，到手香驅蚊，蕃茄可以食。Horace作狀打冷震，佢話唔敢食，種嚟睇巳經夠。終於佢好仗義咁收留咗我啲植物。
* * * * * * * * *
之後探佢，由樓下望上去，三樓一片綠，好斑駁，高棟棟嘅番茄爬滿所有窗戶。一入office，大陣草青味，原來Horace分咗好多盆蕃茄出嚟，果實雖然唔少，但全部青BB﹐呢度嘅陽光真係爭啲。問佢有冇疏苗，Horace話唔理強弱，只要出到苗都種好佢。搵番棵到手香，一貫的粗生到暈，好多梗，葉片肥厚。至於吊蘭，巳經生咗好多下一代出嚟，Horace仲問我要唔要。
* * * * * * * * *
再之後，Horace盆栽嘅數量唔可以再用個「啲」字嚟形容。有一期，佢張枱擺滿躝藤植物叮叮噔噔，搞到佢成隻森林精靈咁。不過隻精靈唔係喺度唱歌而係打電腦。由嗰陣開始，佢喺FB不時po啲花花草草，呃咗好多like。大家讚佢喺工廠區開闢咗個secret garden，佢呢間租畀人上瑜伽堂、開會或排練嘅多用途工作室本來嘅設計就以木紋為主，另外又一直擺放漂書箱歡迎愛書人循環使用舊書，將辦公室變得綠油油可謂一拍即合。Horace眉飛色舞地同我講佢喺花墟同網店見到好多未見過嘅得意植物，細細盆，唔算貴；有啲花盆賣得好平，又出示某些店家給他的特效花藥，講到點好，不過唔知咩成分。我話任何容器都可以做花盆，搵個膠樽入啲糖、水同果皮，擺一兩個月就造到環保酵素，開稀佢造肥料就安全得多。
* * * * * * * * *
隔一陣再去佢度，發現佢枱底多咗好多大大支嘅自釀環保酵素，等待熟成。另外，佢收集客人用完嘅瓶瓶罐罐，好有創意咁改裝成獨特嘅花器。
* * * * * * * * *
而家，唔止辦公室變咗花園， 工作室亦變埋綠，例如lift口用虎尾劍代替以往嘅假花，玄關放龜背竹嚟迎客，所有房間都盡量搵放小盆栽做裝飾，同時清除空氣中嘅毒素。Horace話早排lockdown停晒工，好彩有好多花花草草打理，日日望住佢哋，幫佢渡過咗好多難捱嘅日子。外面雖然灰濛，胭脂雲依然生得密密麻麻，灰白色的頂部透著淡粉紅，好精靈。黃金萬年草啱晒懶人，唔使點灑水，唔覺唔覺，忽然生多咗十幾粒，粒粒漲卜卜。常春藤同黃金葛嘅枝葉伸展得好長，長到可以打蛇餅。Horace話最得佢歡心係同李香蘭差一個字嘅夢香蘭，雖然只係細細朵花仔，佢一直冇失拖keep住開花。植物真係正，就咁努力做好自己，唔聲唔聲就幫到人。